Der frühere Radio-DRS-Politsatiriker Heinz Däpp («Schnappschüss») irrte sich neulich in der Türe.
Deshalb landete er bei uns auf der Redaktion. Wo Herr Däpp schon mal da war und wir grad ausgiebig am Apéro Käfelen und er per se zu vielen Themen eine Meinung hat, däpponierte Hene seine Einschätzung über den modernen Fussball:
«We hütt dr FC Muttestüpfer gäge BSV Rasehüpfer spiut, de teilt ds Wettbüro Cosa Nostra ds Wladiwostok am Aabe vor em Spiiu em Schiedsrichter u de beide Trainer dr Spiiuverlouf u ds Resultat mit. U itz müesse di Trainer zäme mit de Spiler das Spiiu uswändig lehre. Ir 16. Minute mues dr Höpperli im eigete Strafruum es Händs mache. Dr Schiedsrichter Blaubart pfyfft e Penalty. Dr Tschümperli schiesst i rächt unger Egge, dr Plütterli hechtet linggs ufe. Eis nou. Ir 37. Minuten e Sololouf vom Böhneli, d Verteidiger dörfe sech nid bewege, dr Plütterli louft use, aber dr Böhneli preicht ds lääre Goou nid. Das isch itz aber dumm ggange, so het’s Cosa Nostra nid vorgseh. Dr Strücheli korrigiert drei Minute speter mit emen Eigegoou. Zwöi nou. Ir 51. Minute sött dr Richeli dr Schiedsrichter stöckle, für dass ne dä cha usesteue, aber dr Richeli, das Trotteli, vergisst’s, was dr Blaubart aus grobi Unsportlechkeit taxiert u nen usesteut. Ir 65. Minute e Corner – dr Plütterli faat dr Bau zwar suber ab, deponiert nen aber irrtümlecherwys im eigete Chaschte. Drü nou. Vier Minute vor Schluss de no ne Spitzugagu vom Chlämmerli, u dr Bau röuelet vor Mittulinie langsam a Pfoschte, so dass dr Gügerli no chli mues nachehäufe. Vier nou füren FC Muttestüpfer, so, wi’s mues sy. Bevor d Spiler göh ga dusche, chöi si ar Billettkasse no d Scheggen abhole. De Trainer u em Schiedsrichter wird Provision diräkt uf ds Bankkonto überwise.
Ungloublech, so Macheschafte! Im Verglych zu dene Fuessbaugangschter chunnt eim dr Sepp Blatter vor wi dr heilig Franz vo Assisi u sy Uefa wi d Médecins sans frontières.»
Heinz Däpps neue Mundart-Satire «Scho wider Geburtstag!» können Sie noch an den kommenden drei Montagen im La Cappella in Bern live erleben.
Das Runde Leder zwitschert
Das Runde Leder auf Facebook
RSS 2.0